Martxoaren 13an Hondarribian jokatu zen mus txapelketako finala. 32 bikoteren artetik atera dira aurtengo irabazleak eta txapelek aurten Arantzarako bidea hartu dute. Goizeko hamarretan hasi ziren partidak, Hordago! ttikira, handira… joz, lehia bizia izan zuten bikoteek azkenera arte. Arantzako Jesus Mitxelena eta Fermin Etxeberria izan dira irabazleak eta Alejandro Cordoba eta Jose Martin Iturralde azpilkuetarrak bigarren izan ziren. Oronoz-Mugairiko Luis Mari Elizaintzin eta Angel Sarrateak eskuratu zuten hirugarren postua eta Pantaleon Errandonea eta Bonifacio Oskoz arantzarrek osatutako bikotea laugarren izan zen. Guztiek eskuratu zituzten garaikurrak, gazta eta Iñurrieta ardandegiko ardo botilak oparitan. Musean partidak jokatzeko aitzakian, giro ederrean egin zuten bazkari legea.
HITZALDI ETA IKASTAROAK
Martxoaren 13an, 28 pertsona bildu ziren Beran pentsioen inguruko azken hitzaldian. Orain artekoen arrakasta ikusita, bertze hitzaldi bat ere antolatu dute. “El banquete” izena eman diete eta CAN en gertatutako aferaren berri jasoko dute hitzaldira bertaratzen direnek. Ikastaro berri bat ere izanen dute aukeran: Despertar con una sonrisa izenburupean, loaren inguruan adinekoek izan ditzaketen zalantzak argitzen saiatuko dira. Caixaren gizarte-ekintzaren laguntza jaso dute ikastaro hauek antolatzeko eta sei orduko iraupena izanen dute. Informatika, memoria lantzeko ikastaroa, senda belarrena eta frantses ikastaroetan ere gogotsu ari dira lanean.
Martxoaren 24an, 55 bazkidek Valentzia inguruak bisitatu zituzten. Martxoaren 26an berriz, mendizaleek Doneztebe inguruan mendi buelta bat egiteko asmoa zuten eta 279 bazkide Donostiara joatekoak ziren, eguna Aginagako sagardotegian giro bikainean borobilduz.