Nafarroako Ehiza Sozialaren Mahaiak egindako lanaren berri eman du berriki egindako prentsa agerraldian. Gehien bat, ehiza legea aldatzeko Parlamentuan UPNren bitartez aurkeztu duten proposamena izan zuten hizpide. Ehiztarien eskari aunitz bildu dituzte bertan eta batez ere, «basurde, azeri edo orkatz ehizaldietan, guarda nahitaezkoa ez izatea».
Ehizaren Mahai honek elkarte ezberdinetako ehiztariak biltzen ditu. Azken hogei urteetan bakoitza bere aldetik ibili dela onartu dute eta horrek, «ez duela emaitza onik ekarri». Horregatik, aitzinera begira, ahots bakarrean bilduta agertuko dira erakundeen aurrean. Parlamentuan eskaria aurkeztu ondotik, beren hitza kontuan hartzea nahiko lukete eta guarda derrigorrezkoa izatea behartzen duen legea aldatzea.