14 eta 18 urte bitarteko Nafarroako Eskolarteko Bertsolari Txapelketako 28. edizioa apirilaren 4an jokatuko da Iruñean, Kalekalde elkartean, arratsaldeko 7etatik aurrera. Zortzi bertsolari gaztek hartuko dute parte Eskolartekoan: Ainara Ieregi (Barañain), Manex Mailharin (Berriozar), Sarai Robles (Barañain), Mikel Lasarte (Barañain), Jokin Pinatxo (Bera), Maddalen Lopez (Lesaka), Joanes Illarregi (Leitza) eta Xabat Illaregi (Leitza).
Gaztetxoen saioaren ondotik bertso-merendua izango da Kalekalde elkartean bertan, Julen Zelaieta eta Amaia Elizagoien bertsolariekin. Sarrera doakoa da.
Aurkezle lanak Alaitz Rekondok eginen ditu, eta Mikel Beaumont, Ekintza Landa eta Nerea Bruñok epaituko dute saioa.
Berrituta dator 14 eta 18 urte bitarteko Nafarroako Eskolarteko Bertsolari Txapelketa. Ikastolen Elkarteak eta Bertsozale Elkarteak elkarlanean antolatuko dute, lehen aldiz, herrialde guztietan oinarri nagusi berak konpartituko dituen Eskolartekoa. Berrituta dator filosofian eta formatuetan.Nafarroako kasuan, Kalekalde elkartearen laguntza izan dute antolaketan.
Ortziraleko saioan lehen bi postu eskuratzen dutenek Euskal Herriko Eskolarteko Bertsolari Txapelketako finalerako sailkatzea lortuko dute. Euskal Herriko finala eta festa ekainaren 21ean izango da, Orion.