Herriko kontseilu eta herri eta hiri elkargoetako bozak izan dira Ipar Euskal Herrian, eta TTIPI-TTAPAk hartzen dituen Sara, Senpere eta Azkaineko datuak aztertu ditugu. Aulkiak lortzeko lehian, herritarren partehartzea haundia izan da hiru herrietan, eta Saran bozak lehen itzulian erabaki baziren ere, Senperen eta Azkainen, bigarren itzuliaren beharra izan da hauteskundeak deliberatzeko, lehen itzulian talde batek ere ez zuelako gehiengo absoluturik lortu.
Saran Laborde nagusi
Aurten estreinakoz, zerrenden alde bozkatu dute Saran, eta ez orain arte bezala pertsonei. Baina saratarrek garbi utzi dute zein nahi duten Herriko Kontseiluan ordezkari. Jean Baptiste Laborderen Sara Zain taldea nabarmen izan da garaile botoen %75,63rekin. Bozetara aurkeztutako bigarren taldeak, Mixel Guerendiainen Har Hitzak, botoen %24,37 eskuratu ditu.
2008tik auzapeza izan den Labordek eta bere taldeak (abertzale eta independenteak) lehen itzulian nagusitasunez irabazi zutenez, ez zen bigarren itzulirik behar izan eta bere taldeak eskuratu ditu herriko kontseilurako jokoan zeuden 23 hautetsietatik 21. Bertze bi hautetsiak Har Hitza taldearentzat izan dira.
Azkainen ezustekoa
Jean-Louis Fournierren Denen Geroa talde independenteak irabazi ditu hauteskundeak. Eta beraz, azken urteotan auzapez izan den Altxa Azkaine taldeko Jean Louis Laduche (eskuina) ez da auzapez izanen, eta are gehiago, lehen indarra izatetik laugarrena izatera pasatu da. Emaitza horiek Pierre Clausell Altxa Azkaine taldetik atera eta Ur Ertsi Larrun (eskuina) talde propioaren zerrendaburu aurkeztu izanaren ondorio izan daitezke. Izan ere, Clausell axuanta gisa Laducheren ondoan egondakoa da, baina 2013ko udan taldetik ateratzea erabaki zuen. Hala, hauteskunde hauetan botoak banatu egin dira bi talde hauen artean. Ez hori bakarrik, Denen Geroa taldea indartsu agertu da, boto kopuru altua eskuratuz. Anita Lacarraren Ideki talde abertzalea hirugarren indarra izan da. 2008an baino boto gehiago eskuratu ditu, baina lehenbiziko itzulitik bigarrenera boto batzuk galduz.
Senperen sorpresa
Ustekabean, azken hiru agintalditan nagusigoa izan duen Elgarrekin taldeak agintea galdu du eta Pierre Marie Nousbaumen Agir Autrement taldeak (zentro eskuina) irabazi ditu bozak. Lehen itzulian Elgarrekin taldea gailendu zen, Dominique Idiart (ezkerra) zerrendaburu zela eta aurreikuspenek auzapeza bera izanen zela zioten. Baina bigarren itzulian Nousbaum nagusitu da 87 botoko aldearekin, eta beraz, berak eskuratu du aginte makila. Jean François Bederederen Senpere Bai talde abertzaleak ere bigarren itzulian lehenbizikoan baino 117 boto guttiago eskuratu ditu eta aulki bat galdu du herriko kontseiluan.
Partehartze altua
2008ko joerari jarraituz, Saran, Senperen eta Azkainen partehartzea haundia izan da. Saran %79,97koa izan da (2008an %77,10koa izan zen), Senperen %76,87koa (2008an %76,73) eta Azkainen izan da hiru herrietan altuena, %80,54koa (2008an %79,70).
Hego Lapurdiko Hiri Elkargoan ordezkari eskuindarrak nagusi
Herri eta hiri elkargoko ordezkariak aukeratzeko bozak ere izan dira Ipar Euskal Herrian. Azkaine, Sara eta Senpere Hego Lapurdiko Hiri Elkargoan sartuak daude, bertze bederatzi herrirekin batera eta herri bakoitzak bere ordezkariak izanen ditu elkargoan. Saran Sara Zain taldeko Jean Baptiste Laborde, Marie Hélène Oronoz eta Henri Dutournier hautetsiak izanen dira Sararen Hiri Elkargoko ordezkariak. Senperek lau ordezkari izanen ditu: Agir Autrement zentro eskuineko Pierre-Marie Nousbaum, Sandra Lissardy eta Benoît Estaynou eta Elgarrekin taldeko Dominique Idiart. Azkainek hiru ordezkari izanen ditu, Denen Geroa taldeko Jean-Louis Fournier, Bénédicte Luberriaga eta Pascal Peyreblanque.
Hego Lapurdiko Hiri Elkargoa osatzen duten hamabi herrien kasuan, ia gehienetan eskuina izan da nagusi, eta beraz, hiriguneko ordezkari gehienak eskuinekoak izanen dira.