Ondoko egunetan auzapez berria izanen da, Christine Bessonartek kargua uztea eta hauteskundeetan ez aurkeztea deliberatu baitu. Egun hauetan azken lanak egiten ditu pentsatuz nori emanen ote dizkion eskuetan dituen txosten eta proiektu guziak: bere lehen auzapez ordeari, hautagai eskuindarrari edo ezker abertzaleko zerrendaburuari. Hautetsontzien epaia ezagutu arte lan eta lan ari da Bessonart eta gisa huntan berriki inauguratu du Karrikarte belaunaldien arteko egoitza, ondoan zituelarik Georges Labazée Pirineo Atlkantikoetako departamenduko Kontseilu Nagusiko presidentea eta Michel Hiriart Hego Lapurdiko hiriguneko burua.
2.122.025 euro gosta den etxe hortan jadanik okupatuak diren 21 apartamendu eta 100 metro karratuko gela publikoa daude eta bertan bizizale guziak biltzen ahal dira. Karrika nagusitik hurbil den eraikin berriari bizia emateko animatzaile bat ibiliko da egun guziz adineko jendeari ibilaldiak eginarazteko eta garbiketak egiteko. Aste guziz bi aldiz animazioak ere proposatuko ditu. Senperen ez baita xahar etxerik eraikiko ondoko urteetan, agintariek eta herriko adinekoen kontseiluak begi onez ikusi zuten alternatiba bat pentsatzea eta hilerriaren aintzinean gelditzen zen lurra baliatzea holako etxea altxatzeko alokairu biziki merkeak proposatuz senpertarreri. Etxe hortan bizi direnek esker ona erakutsi eta zinez pozik daudela erran zuten inaugurazio egunean jornal ttikiekin ere etxe biziki modernoa baitute beren herrian bertan. Ofice64 erakundeak burutu duen proiektua egiteko %18ko diru laguntzak izan dira: 190.982 euro departamendutik, 91.800 euro gobernutik, 63.661 euro Senpereko herriak emanik eta 24.867 euro Hego Lapurdiko Hirigunetik. Gaurko egunean, Ofice64 erakundeak 41 etxebizitza alokatzen ditu Senperen. Aurten 17 gehiago eraikiko dituzte eta bertze 32 heldu den urtean.