UEMAko Nafarroako udal ordezkariek prentsa agerraldia egin zuten martxoaren 12an Leitzan. Nafarroako euskalgintzak bizi duen egoeraren aitzinean «kezka eta haserrea» agertu zuten, «Nafarroako Gobernuak, bertze behin, inolako diru-laguntzarik gabe utzi duelako euskara bultzatzeko ekimen eta lan oro».
Udalek azkeneko urteotan Nafarroako Gobernuarengandik finantziazio murrizketa handia pairatu dute, eta horien artean, Euskara Zerbitzuek jasan dutena nabarmendu dute eta salatu dute «urterik urte laguntzak murrizten joan dira, erabat desagertu arte». Euren ustez, agerian gelditu da «Nafarroako Gobernuak hizkuntza politika argi eta planifikatu bat baduela Nafarroarako: euskara eremu publikotik erabat desagerraraztea».
2013an inolako diru-laguntzarik gabe gelditu dira Nafarroako udalak eta mankomunitateak euskara zerbitzuetako plangintzak garatzeko. Eta 2014rako aurreikuspena ere bera da, «inolako diru-laguntzarik ez jasotzea» azaldu dute.
«Egoera jasangaitza» dela esan dute eta udalez gain, euskalgintzako gainerako eragileei ere eragiten diela. «Nafarroako aniztasunari bizkar eman eta bertako hizkuntza sustatzeko politikak bazter utzi ditu» euren hitzetan gobernuak. Bestelako hizkuntza politika bat «nahi eta behar» dutela aldarrikatzeko Iruñeako martxoaren 22ko manifestazioarekin bat egin dute eta herritarrei joateko deia egin diete.