Elizondoko Francisco Joaquin Iriarte Zahar Etxean Idea Innovación enpresa pribatuari kontratua luzateko Zahar Etxeko patronatuak hartutako erabakiaren harira hausnarketa karrikaratu du LAB sindikatuak. Gestio publikoaren aldekoak direla adierazi dute, «bere sorreratik honat, orain 150 urte Baztango jendarteari eman zaion zerbitzu publiko eta irekia izan den heinean».
LAB ez dago ados pribatizazioak ekarri dituen ondorioekin. «Gestioa pribatizatu eta 5 urtera, lan harremanak txartu egin dira nabarmen, eta zoritxarrez gestio pribatuak atzerapausuak ekarri ditu lan eskubideetan», dio LABen idatziak.
LABek ez du Patronatuaren erabakia ulertzen, ez baitu kontuan hartu Udaletxearen eta langileen iritzia. «Espero dugu dugu hartutako erabaki honek Baztango Zahar Etxeko langileen lan baldintzetan eta agureei ematen diogun zerbitzuan ondorio txarrik ez edukitzea», dio sindikatuaren oharrak.