Bardoen bigarren fasea abiatu zen larunbatean Iturengo Herriko Etxeko Ganbaran egin zen saioarekin. Giro ederra sortu zen Herriko Etxeko ganbaran, 50 bertsozale inguruk segitu zuten saioa bertatik bertara, eta bertsolariek egin zuten lana babestu eta lagundu zuten. Saioa merendu oparo batekin akitu zen.
Iturengo Iker eta Egoitz Gorosterrazuk eta Oronozko Amaia Elizagoienek osatutako Etxeko Kontuk eta Iruñeko Bertze Maldikoak taldeak aritu ziren Iturenen. Saio bizia eta umorez beterikoa eskaini zuten. Bardoak ekimenaren bigarren faseak hainbat lan berri ditu eta horiekin are gehiago sumatu zen talde lanaren garrantzia. Azkenean, etxeko taldearentzat izan zen jokoan zegoen puntua. Bi talde hauen bigarren saioa hilaren 29an izanen da, Iruñean.
Hori baino lehenago Bardoak ortziralean, hilaren 14an, Elizondoko Lepatanatuek 2 eta Lesakako Zortziko Haundiena taldeak arituko dira; 20:30ean Intza ostatuan.
Martxoko azken asteburuan, berriz, Bardoen bigarren faseko azken lau saioak jokatuko dira, Igantzi, Leitza eta Iruñean bi.