Malerrekako eskuz binakako hamabigarren pilota txapelketan, kadete mailako finalerdiak jokatu dira otsailaren 15ean, larunbat arratsaldean Doneztebeko udal pilotalekuan. Honela, otsailaren 22an jokatuko diren finaletako protagonista guziak zein izanen diren ezagun da.
Kadete mailako finalerdietako lehenbiziko partida borrokatuan, Oberenako Garcia eta Cordónek 18 eta 17 irabazi zieten Errekako Salaberria eta Mariezkurrenari eta bigarrenean, Lazkaoko Zubizarreta eta Alberdik 18 eta 12 irabazi zieten Titin IIIeko Marcos eta Lazkaoko Muruari.
Finalistak
Gisa honetara, Malerrekako eskuz binakako finalista guztiak erabakiak gelditu dira eta larunbat honetan, otsailaren 22an jokatuko dira finalak Doneztebeko udal pilotalekuan. Goizeko 10:30ean hasita, kategoria ttikienetako hiru partidak jokatuko dira.
Benjaminetan, Ilunpeko Arzallus eta Arrizabalaga, Lazkaoko Iribarria eta Zubizarretaren kontra ariko dira.
Alebinetan, Ilunpeko Egiguren eta Alberdi, Ardoiko Igoa eta Etxagueren kontra ariko dira finalean.
Infantilen kategorian, Añorgako Orbegozo eta Oliden, Zazpiturriko Osa eta Zubeldiaren kontra ariko dira.
Bazkalondoan, arratsaldeko 4:30ean hasita, bertze lau kategorietako finalak jokatuko dira.
Kadeteen kategorian, erran bezala, Oberenako Garcia eta Cordón, Lazkaoko Zubizarreta eta Alberdiren kontra ariko dira.
Jubeniletan, Tartaloetxeko Matxin eta Arangurenek, Markinako Zubikarai eta Urizar izanen dituzte arerio hondar partidan.
Bigarren mailako seniorretan, Andoaingo Escudero I eta Elustondo, Oiarpeko Hernandez eta Imazen kontra ariko dira.
Elite mailako kategoria nagusian, azkenik, Buruzgaingo Esain eta Huarteko Tabar, Oberenako Diaz eta Iturriagaren kontra ariko dira.