Arkupeak Elkarteko aurtengo ekintzak otsailean hasiko dira herriz herri ospatuko diren Arkupeak Elkartekoen jaiekin. Urteroko ohiturari eutsiz, hildako bazkideen omenezko meza eta bazkaria izanen dira eta horren ondotik, musean aritzeko aukera izango dute eskualdeko muslari trebeek txapelketa antolatu baita. Herriz herri irabazten duten bikoteek, Hondarribian jokatuko den finalean aritzeko txartela lortuko dute. Aipatu, herri batzuetan, Leitzan eta Elizondon adibidez, Arkupeak Elkartearen Eguna ospatu aurretik jokatzen direla mus txapelketako partidak.
ARKUPEAK EGUNA
Otsailak 1 - Almandoz
Otsailak 2 - Etxalar
Otsailak 5 - Arantza
Otsailak 7 - Igantzi
Otsailak 9 - Eratsun
Otsailak 13 - Elizondo/Arizkun
Otsailak 14 - Doneztebe
Otsailak 16 - Bera/Ezkurra/Leitza
Otsailak 23 - Sunbilla
IKASTARO ETA HITZALDIAK
Pasa den urteko ikastaroak mantendu eta berriak eskainiko dira aurten. Izen emateko epea urtarrilaren 31n amaitu zen eta segidan bilerak egingo dira. Aldez aurretik jakinaraziko da zein egun, ordu eta lekutan izanen diren bilera hauek.
Pentsioen inguruan han hemenka zabaldu diren berriek kezka sortzen dutela ikusita, gaiaren inguruko hitzaldiak antolatu dira. Patxi Urrutia aditua izanen da hizlaria. Lehenengo saioa otsailaren 6an izanen da Arkupeak Elkartekoen Doneztebeko egoitzan, arratsaldeko 6etatik aurrera. Hurrengoa berriz, otsailaren 13an Leitzako zinean izanen da 18:00etan. Martxoan Elizondo eta Beran ere eskainiko dira hitzaldi hauek.
MENDI IRTEERAK
Aurtengo lehenengo mendi irteera, otsailaren 26an izango da. Ezkurra inguruko paisaiak ezagutzeko aukera izanen dute bazkideek lau ordu eta erdiko ibilbidean. Parte hartu nahi dutenek, 948 450878 edo 646548610 telefonora deitu beharko dute. Goizeko 8:30ean elkartuko dira mendizaleak Barranka ostatuan eta bertan bukatuko dute ibilbidea. Babarrun platerkada bikain bat esperoan izanen dute sakramentu eta guzti. Hurrengo aleetan, San Donato, Txindoki, Gorbeia, Donejakue Bidea eta Pirinioetara egitekoak diren irteeren berri izanen duzue.