Igande honetan aurkeztu dute Kasino elkartean Erreka elkartearen triatloi sekzio berria. Gorka Bidegain taldekideak aipatu digunez, «23 kirolari federatu eta bertze 16 ez federatu izanen gara taldean. Taldekideak Sunbilla, Elizondo, Arizkun, Lekaroz, Mugairi, Iruñea, Elgorriaga eta Doneztebekoak gara... Hiru emakume ere baditugu taldean».
Orokorrean taldearen helburuak Euskadiko eta Nafarroako probetan parte hartzea izanen da, duatloi eta triatloietan... «Talde berria denez, hori izanen da helburua, parte hartze horiekin taldea beste urteetarako sendotzea» dio Bidegainek.
Kirolari bakoitzak bere helburu partikularrak ere baditu, «hala batzuk duatloietan parte hartzea dute helburu, bertze batzuk triatloi olinpikoetan, eta bakarren batek, iron man batean..». Horiei guztiei eta ondotik etorri nahi dutenei babesa emanen die Errekako Triatloi sekzioak.