Inauteri giro bikainaz gozatu zuten herritar eta bisitariek

Urtarrilako azken asteburuan izan ziren inauteriak. Euria ortzilaz geroztik ez zen gelditu baina igandean ateraldi ederra egin zuen eta ka­rrozen desfilerako primeran etorri zen. 

 

Ortziralean 29 gaztek eman zieten hasiera inauteriei Ariztigain kanpinean gosalduz. Ondotik baserrietara joan ziren bi taldetan banaturik. Talde bat Joxe An­gel akordioiolariarekin eta bertzea Modestorekin. Exkenekoborda eta Istola baserrietan bazkaldu zuten urteroko ohiturari eutsiz. 

 

Arratsaldean eskolako haurrek desfile ttikia egin behar izan zuten eguraldiak ez zielako batere lagundu. Goitiko eskolatik beheitiraino etorri eta denak elkarrekin frontoiraino joan ziren, musikaren laguntzaz. Han ikuskizun ederrak eskaini zituzten. Ondotik frontoian musika izan zuten dantzan disfrutatzeko. 

 

Gauean emakumeen txanda ailegatu zen. Afarira joan baino lehen he­rrian barna aukera izan zen Josi edo Urratu txarangek  jotako musikaz gozatzeko. 104 emakume elkartu ziren Ulibeltzak elkartean bes­ta ederra egiteko. Gazteek bitartean Itturburun afaldu zuten. 

 

Larunbatean berriz herriaren txanda ailegatu zen. Herrian barna eskean ibili ziren Beñat Mitxelena akordeoilaria lagun zutela. Fondan bazkaldu zuten eta Elor­txurin afaldu. Arra­tsal­dean haurrek Ulibel­tzak elkartean musika izan zuten. 

 

Bukatzeko egun haundia, igandea. Eguraldia lagun, gazteen hiru karrozekin hasi zen desfilea. Lehendabiziko ka­rroza, tortillarena, aurten berritu dute eta gazteek eskerrak eman nahi dizkiete lanean parte hartu dutenei. Ondoren saldarena eta segidan taloak gaztarekin, gaztainak eta ardoa. Guztira 1.400 arraultza, 350 li­tro salda, 85 kilo gaztain, 150 litro ardo, eta 600 talo 8 barra haundi gaztarekin. Aurten karrozek buzoitxo bat zuten borondatea emateko eta 400 euro bildu ziren.  6.680 boleto ere saldu ziren, desfilearen ondoren zozketatzen diren zerria eta bildotsaren­tzat. Hainbat karroza izan ziren: Territorio Koman­txe, Alibaba eta 40 lapurrak, Teo baserrian, Lehengo kontrabandisten bizimodua, Lucky luke y los Dalton, Bar 2 karabana,  Batukada desesperada, Konkistara bueltan, Twister, Ezkontza errumaniarra, Alaska eta Mario eta kainoi batekin elurra bota eta gazteak eskiatzen zuten ka­rroza.  

 

Behin desfilea bukatuta zerri eta bildotsaren zozketak egin ziren eta biak ez ziren oso u­rrutira joan. Zerria 5177 zenbakiarekin Xabier Petrirenak eraman zuen. Bil­dotsa bi aldiz zozketatu zen eta biga­rrenean Mari Paz Gelbentzuk eraman zuen. Boletoak saltzen Jesus Mari Jorajuria, Braulio Sanchez eta Joseba Alzuri aritu ziren. Ondoren Ulibel­tzak Elkartean bazkaria eta musika Santxotenaren eskutik. Asteburu ederra izan zen. Eskerrak inauterietan parte hartzen duten guziei, baina berexiki lanean aritzen direnei. Lan ederra baitago guzi ho­rren atzean. Zorionak.