N-121-A errepidean izandako azken istripuak direla-eta, Bortzirietako udaletako ordezkariek behingoagatik neurri eraginkorrak har ditzan eskatu zioten Nafarroako Gobernuari «normaltasunetik urruti gertatzen diren istripu kopuru altu eta larri hauen aurrean». Errepide honetan azterketa bat gauzatzea eskatu zuten, «jada identifikatuak dauden puntu arriskutsuetako lurzoruei eta istripuetan eragiten duten hainbat faktoreei dagokienean».
Istripuak eragiten dituzten faktoreen artean, kamioiek abiadura mugak ez errespetatzea dagoela adierazi ondotik, Nafarroako Gobernuak erantzunkizuna eta konpromezua hartzea eskatu zuten, «etorkizun hurbil batean, errepide honek eragiten dituen istripu larriak murriztu eta orokorrean errepidearen egoera eskualdeak merezi duen modura egokitzeko».
N-121-Ako Zalaingo zatian azterketa sakona egitea ere eskatu zuten, «ikusita lurzoruan begi bistakoa den arazo bat dagoela, maiz gertatzen diren istripu larriak horren adierazle dira. Abiadura mugak murriztu eta muga hauek errespetatzen direla bermatu behar da».
Urtarrilaren 25ean, 300 bat lagun bildu ziren Zalaingo gasolindegi ondoan, gizarte eragile eta sindikatuek deitutako kontzentrazioan, Istripu gehiagorik ez! N-121-A konponbideak orain! goiburupean. «Bortzirietan bizi garenok nekatuak gaude, nazkatuak, eta aldi berean beldurtuta gure errepide nagusian gertatzen denaren aitzinean» adierazi zuten.
Otsailaren 6an bilera bat egitekoa dute Baztan-Bidasoaldeko udal ordezkariek sustapen kontseilariarekin.