Urtarrilaren 10ean, Lesakako Linddurrenborda sagardotegian egin zen Nafarroako sagardotegi denboraldiaren hasiera ekitaldia. Donato eta Patxi Larretxea anaiak izan ziren sagardo berria, Txirrita izeneko Kupelean azken hilabeteetan ondutako zukua, dastatzen lehenak.
Denboraldiko lehendabiziko txotxa egin aurretik, Jo ala Jo taldeko Xabi Torres, Oianko Garde eta Beñat Etxabarrik kirikoketa joz eman zioten hasiera ekitaldiari. Unai Arriagak aurreskua dantzatu zuen ondoren, Patxi Larraldek txirula eta ttunttunarekin lagunduta. Larretxea anaiek sagardoa dastatu eta oniritzia eman ondotik, Linddurrenbordara hurbildutako lagunek ere txotx egiteko aukera izan zuten.
UZTA ESKASA
Aurtengoa uzta eskaseko urtea izan dela azaldu dute baina hala ere, 200.000 litrotik goiti ekoiztea lortu dute Dolarea elkartea osatzen duten sagardogileek. Lesakako Linddurrenbordarekin batera, Lekarozko Larraldea, Berueteko Behetxonea, Aldazko Martitxonea eta Lekunberriko Toki Alai sagardotegiek osatzen dute Dolarea, Nafarroako Sagardotegien Elkartea. Lesakako Linddurrenborda sagardotegian, 25.000 litro inguru egin dituztela aipatu digu Juan Mari Lopez nagusiak, «azken urteetan bezalatsu». Bertze sagardotegietan kanpoko sagarra ekarri behar izan badute ere, Lesakakoan dena bertako sagarrarekin egin dutela aipatu digu, «Lesakatik, Doneztebetik, Arantzatik eta Oiartzundik ekarria». Lehendik ere bitan ireki da Nafarroako sagardotegi denboraldia Linddurrenbordan. 2000. urtean Andoni Egaña bertsolariak ireki zuen eta 2004an Sebastien Gonzalez pilotari azkaindarrak.