Ortzegunetik hasita eta asteburu osoan han eta hemen puxkak biltzen ibiliko badira ere, Aurtitz, Ituren eta Zubietako inauteriei sona eman dieten joaldunak astelehenetik asteazkenera ibiliko dira herriz herri joareak astintzen.
Ilbeltzak 27, astelehena
Goizean Zubietako joaldunek, mozorro eta karrozek lagunduta, bisita eginen diete aurtiztarrei lehenik. Herriari bira eman eta salda beroa hartu ondotik Iturenera joanen dira. Lasagako Zarandia parean, Iturengo joaldunekin elkartu eta herrian barna buelta emanen dute. Joaldunek aperitiboa hartzen duten bitartean, Iturengo plazan karroza bakoitzak eta mozorroek beren ikuskizuna eginen dute, joaldunek uxatu baino lehen.
Ilbeltzak 28, asteartea
Goizean Ituren eta Aurtizko joaldunek bisita bueltatuko diete zubietarrei, batzuen ustez natura ernatzeko eta uzta berri eta ugariak emateko egiten den ohiturari eutsiz.
Ilbeltzak 29, asteazkena
Zubietan egun hau izaten da inauterietako azken eguna. Eguerdian bazkaldu ondotik kontuak egiten dira. Ondotik joareak jarri eta Aurtitz eta Iturendarrei azken bisita egiten zaie ilunabarrean. Aurtiztar eta iturendarrek asteazkenean bazkaldu eta arratsaldean etxez etxe ibiliko dira joare eta trikitilariekin. Ondotik afariak izanen dira elkarteetan.
Otsailak 1 eta 2, larunbata eta igandea
Kontuen eguna da Iturenen inauterietako azkena. Egun horretan ez da joarerik jotzen. Inauteriak akitu eta hurrengo larunbatean egin ohi da Iturenen, eta Aurtizen igandean. Iturenen bazkaria izanen dute Herriko Etxeko ganbaran. Bazkaldu aitzinetik herriko dantzarien saioa eta bertsolariak eta aizkora apustua izanen dira herriko plazan. Bazkaldu ondotik dantzaldia eta kontuen afaria. Aurtizen xaharren afaria eginen dute igandean.
Zubietako Herriko Ostatuan asteburu honetarako egitaraua
Besta giroarekin bat eginez, Herriko Ostatuan ere zenbait ekitaldi antolatu dituzte asteburu. Urtarrilaren 24an, beste urteetako inauterietako irudiak agertzen dituen ikusentzunekoa erakutsiko dute, ostiral gaueko 9ak aldera. Urtarrilaren 25ean, larunbat gauerdian hasita festa mexikarra izanen da, Puro Relajo taldearekin. Igandean inauteriak hasiak izanen dira, baina gauerditik aitzinera Tororo DJ ariko da.