Gure hizkuntzarekiko maitasuna eta atxikimendua adierazteko, abenduaren 3a baliatu zuten Olhain ikastolako ikasleek, euskararen eguna ospatzeko.
Haurren ideietatik abiatuz arratsalde berezia antolatu zuen ikastolak: haurrek eginiko marrazkiak herrian zintzilikatu zituzten, eta herria euskararen koloreekin alaitu. Ikastolako zaharrenek asmakizun eta erran zaharrak zintzilikatu zituzten herriko xoko ezberdinetan. Eta arratsaldea bukatzeko, jokoak egin zituzten plazan.
Aurtengo proiektu pedagogikoetan azpimarratzen ahal da haurren arteko kooperazioaren inguruan eramaten den lana, haien arteko harremanak ahalik eta hoberenak izan eta ikastolako bizian aktiboagoak izateko.
Hunekin lotua, Orekaz proiektua iaz bezala aurten ere martxan eman dute ikastolan. «Gorputz heziketa lantzeko modu aktiboagoa da, eta inguruan ditugun toki naturalak gehiago erabiltzera bultzatzen duena. Hemen kooperazioak garrantzi handia du norberaren emozioak eta bertzeenak ere kontutan hartu behar baitira», ikastolatik jakinarazi dutenez.
Bertzalde, adin guztietako ikasleak nahasi eta ikasle gazte eta handien artean elkar ezagutza bultzatzen dute. Bi astetik behin, haurrak bikoteka ari dira lanean, eskulan baten inguruan. Adin ezberdinen arteko harremana bultzatzeaz gain, zailtasunean dena goxotasunean lagundua da. Handienek pozik laguntzen dituzte gazteenak eta gazteenak loriatzen dira handien arretarekin.
Aurten sagarra hautatu dute urteko gai nagusi bezala eta hunen inguruan urtean zehar zonbait ekitaldi egiten ari dira. Adibidez, azaroan Lehen mailako ikasleak Astigarragara joan dira Sagardoaren museoa bisitatzera. Euskal Herriko sagar mota guzien ezaugarriak aztertu ondotik, sagarrak bildu eta sagar jusaren ekoizteko prozesu guzia esperimentatu ahal izan dute, aspaldiko tresnak eta teknikak erabiliz (sagar biltzea, puskatzea, tinkatzea, jastatzea…).