Eguberri heldu dela eta urtero bezala Olentzero eta Mari Domingi Sarako plazara hurbilduko dira. Eskoletako haurrek ongi etorria eginen diete arratsaldeko 5etan kantu eta musikarekin. Ondotik desfile bat eginen dute karriketan barna beti ere musikarekin, zahar etxetik ere pasako dira kantu batzu emateko eta plazan bukatuko dute.
Eguberri bezperako meza abenduaren 24an emana izanen da gaueko 8etan elizan eta 25ean goizeko 10:30ean.
URTATS GAUA
Le pullman jatetxeak urtats gaua ospatuko du. Horren karietara 75 euroko menu bat proposatzen dute, edariak kondatu gabe: Sartzeko, xipiroi pipertuak eta portuko zizka mikak, ondotik Landesetako gibel gizena. Segitzeko abakando erdia bere zitroinezko gurinarekin eta «trou basque», ondotik idikia onddoekin eta sagar beteak. Bukatzeko gasna eta deserta ttiki ainitz. Gaualdia Dj batek animatuko du eta opariak ere irabazten ahalko dira.
Bertzalde Sarako Izarrak errugbi elkarteak, joan den urtean bezala, bere urtats gaua antolatuko du Lur Berri gelan.