Joan den urtean, talde berria eta gaztea zuen Amaiurrek eta ez zuen Nafarroan sokatira txapelketan txapelik lortu. Aurten, ordea, tiralari horiek esperientzia hartu eta 640 kiloko txapela janztea lortu du. Elizondon jokatu zen lehen saioan tiraldi guziak irabazi zituen eta Berriozarren herriko taldearekin berdindu arren, txapela Baztanera ekarri zuten.
640 kiloko txapela jantzi ondotik, 600 kiloko Nafarroako sokatira txapelketari ekin zion Amaiurko taldeak. Herrian azaroaren 16an jokatutako lehen jardunaldian tiraldi guziak irabazi zituen, 3 puntu eskuratuz. Berriozar izan zen bigarren eta Txantrea hirugarren. Lerro hauek idazterakoan ez da segurua, baina zuzenbidean kategoria honetako txapela ere janzteko modua zuen Amaiurrek, larunbatean Lesakan jokatzekoa zen bigarren eta hondar jardunaldian.