Batera plataformak azaroaren 30ean Maulen eginen duen manifestaldiarekin bat egin du Ipar Euskal Herriko auzapezen biltzarrak, hauen artean bere buruak, Christine Bessonart Senpereko andere auzapezak. Manifestaldian parte hartzera deitu dituzte hautetsiak eta herritarrak. Bertan galdetuko da Iparraldeko lurralde elkargo berezia sortzea Frantziako errepublikaren barnean garai hauetan egiten ari den deszentralizazio prozesuaren baitan. Euskararen ofizialtasuna, unibertsitatearen sortzea eta laborantza ganbara sortzea ere aldarrikatuko dira Xiberoko hiriburuko karriketan.
Frantziako gobernuak ezezkoa eman dio jadanik lurralde elkargo berezia sortzeari baina Bessonarten arabera ez da ideia hau galdu behar hautetsien gehiengoak sostengatzen baitu eta lurraldeak behar duelako bere geroa bermatzeko. Gogoratu du azken urteetan gogoeta sakona egin dela bi unibertsitarirekin eta 104 auzapezek horren aldeko sinadura eman dutela, hau da hirutik bik. Joan den ekainaren lehenean Baionan egin zen manifestaldiaren ondotik, Maulen dei bera helarazi behar zaiola gobernuari uste dute hautetsiek. Badakite Paristik datozen berriak ez direla onak eta "mespretxu" horrek dezepzioa ekar dezakeela. Dena den, ez dela amore eman behar diote hautetsi euskaltzaleek. Begi txarrez ikusten dute azken urteetan eskuinak eta ezkerrak izan duten jarrera ez baitiete erantzunik ematen Ipar Euskal Herriaren aldarrikapenei. Hautetsiak beldur dira giro politikoa berriz gaiztotzea funtsean berriki ikusi den bezala ezezagunek udako bi etxe erre dituztelarik Aiherran eta Itsasun. Gazte batzuen radikalizazio arriskuaren aitzinean egoera sanotzea errespetuz galdegin diote Frantziako gobernuari.