Herriko historian atzera begira jartzea ariketa interesgarria izan ohi da. Egungo egoera garai batekoarekin alderatzeko aukera ematen digu eta hala ohartzen gara, orduan ere ez zirela esne mamitan bizi.
60-70.hamarkaden bueltan, Ezkurrako gazteek lan baldintza gogorrak sufritu behar izan zituzten bizirauteko. Herriko 60 gazte baino gehiago joan ziren mugaz beste aldera mendi lanetan aritzera. Tartean, 1963an hogei gazte joan ziren Kanadara. Baldintza gogorretan bizi behar izan zuten, neguan tenperatura oso baxuei eta udan berriz altuei aurre eginez. Mariezkurrena etxeko bost anaiek emigratu zuten eta Baztanea etxeko hiruk. Urte batzuen ondotik, denak itzuli ziren bi izan ezik: batek hogei urtez segi zuen bertan lanean eta aldian aldian Ezkurrara itzultzen zen eta besteak oraindik ere bertan segitzen du.
Gaur egun ere asko dira atzerrira joan beste erremediorik ez duten gazteak. Garai batekoak bezalaxe, duintasunez bizirauteko modua lortzea dute helburu.