Birziklapena hobetu asmoz eta hondakinen inguruko legedi berria betetze bidean, Bortziriak eta Malerrekako Mankomunitateek eta Baztango Udalak zaborrontziak berkokatzea eta edukiontzi mota guztiak dauden puntuetan biltzea erabaki dute.
Horregatik, proiektu honen barrenean, paper-kartoi eta enbase edukiontzi gehiago paratzen hasi dira. Guztira, 36 edukiontzi berri paratu dituzte, 18 urdin eta 18 hori. Momentuz, Bortzirietatik hasi dira, baina hurrengo hilabeteetan Baztanen eta Malerrekan ere edukiontzi gehiago paratuko dituzte. Herriguneetan puntu berri batzuk sortu dira, falta ziren karriketan edo auzoetan, baina batez ere baserri-auzoetan bizi diren bizilagunei hurbildu nahi izan dizkiete birziklatzeko edukiontziak. Hori dela eta, baserri auzoen sarreretan puntu berriak sortzea erabaki dute. Horrela hondakinak bereiztea errazten da eta portzentaiak igotzea espero dute, hondakinak kudeatzen dituzten erakundeek oroitarazi dutenez, «ezin baitugu ahantzi oraindik %25 bakarrik birziklatzen dugula!».
OLIO EDUKIONTZIAK ERE
Baztanen 4
• Elizondo: Jaime Urrutia 55 eta Braulio Iriarte 37.
• Erratzu: Utselei 24, sarrerako pisuetan.
• Oronoz: Suhiltzaileen ondoan.
Bortzirietan 2
• Bera: Altzate karrikan, Lixoia ostatuaren parean.
• Lesaka: Plaza Zaharreko aparkalekuetan.
Malerrekan 2
• Ituren: Latsagako bidean, zubiaren ondoan.
• Donamaria: Uxarrea auzoan, Herriko ostatuaren parean.