Floren Nazabal, Juanjo Lopez, Jon Rekondo, Ruben Saralegi eta Antonio Senosiain sailkatu dira azaroaren 15ean Donezteben jokatuko den Nafarroako Lehen Mailako aizkolari finala jokatzeko. Urriaren 6an Etxarri Aranazen jokatutako kanporaketan finaletik kanpo gelditu dira Ander Erasun aurtiztarra, Larretxea aita-semeak eta Aitor Senosiain.
Senosiainek, gainera, maila galdu egin du, eta ikusi beharko da Oihan Larretxearekin zer gertatzen den. Kanporaketan, gerriko minez zegoelako, ezin izan zuen aritu Xabier Mindegiak, eta mailari eusteko kanporaketa jokatu beharko du Larretxea gaztearekin.
Aizkolari bakoitzak bi kana-erdiko, bi 60 ontzako eta oinbiko bat moztu behar izan zituen Etxarrin. Floren Nazabal zen kanporaketa irabazteko faborito nagusia. Bere zortzigarren txapela lortzeko lehian aritu zen eta ez zuen arazorik izan garaipena lortzeko (13:16). Bigarren Juanjo Lopez izan zen (14:25), hirugarren Jon Rekondo leitzarra ((14:35), laugarren Ruben Saralegi leitzarra (15:14) eta bosgarren Antonio Senosiain (17:03).
Ezusteko nagusia Donato Larretxearena izan da da, ez baitzen finalean sartu. Zazpigarren egin zuen. Ander Erasun aurtiztarrak ere ez zuen lortu finalerako txartela. Azkenaurreko enborra Antonio Senosiainen denbora berean moztu bazuen ere, azkenean seigarren izan zen. Antonio Senosiainetik 15 segundora bukatu zituen lanak. Oihan Larretxea zortzigarren izan zen eta Aitor Senosiainek azken postua lortu zuen.