Udazkeneko lehen egun hauetan ehiztariek hasi dute beraien uso denboraldia. Gaurgero eskopetak, kartutxoak eta nola ez gogoak prest dituzte, puestora bueltaxka emateko. Naturak ematen dizkigun gauza goxoak ere dagoeneko ateratzen hasiak dira, nahiz eta gutti izan onddoak hemen ditugu, pixka bat esperatu beharko dugu gaztain morkotxak ireki eta gaztaina hartzeko, gero suan danbolinean sartu eta sagardo goxo goxoaren laguntzaz gozatzeko!!!
RUPER ORDORIKA
Urriaren 31n kontzertu bikaina izanen dugu Herriko Etxeko ganbaran. Malerrekako euskara zerbitzuak antolatuta, Ruper Ordorika oñatiarra etorriko zaigu. Oso kantari ezaguna dugu Ruper, hamasei diska kaleratuak ditu dagoeneko, 1980. urtean Hautsi da Amphora izan zen lehena eta azkena berriki atera duen Azukre koxkorrak. Bertzalde bizpahiru diska ere atera ditu Mugalariekin batera eta Hiru Trukurekin. Hainbat eta hainbat abesti izan ditu famatu eta entzunak, horien artean Ez da posible, Zaindu maite duzun hori… Bere azken lana aurkezteko bigarren kontzertua izanen da Iturengoa, Baionakoaen ondotik. Azken diska honetan Euskal Herriko talde batzuen kanten bertsioak egin ditu, bere ukitua emanez