Garapen iraunkorrerako ekimenak izeneko mintegia eginen da urriaren 8an, astearte goizean Bertizko Jaurerria Parke Naturaleko Jauregian.
Astearte goizeko 9:00etan emanen da dokumentazio eta ordu laurden beranduago ongietorri ekitaldia eginen da, César Pérez Martín, Nafarroako Gobernuko Landa Garapen, Ingurumen eta Toki Administrazioko Uraren Zerbitzu zuzendariaren eta Fabianne Sans, SMEAK elkarteko ordezkariaren eskutik. Bi hauekin batera, Fernando Mendoza GANeko teknikariak eta Pablo Muñoz, Nafarroako Gobernuko Habitaten Ataleko buruak TFE proiektuaren aurkezpena eginen dute.
10:00etan, Bertizko Partzuergo Turistikoko Izaskun Goñik EuroVelo eta Bidasoko Bide Berdea eta BKZko Mattari Altzuarek Baztan Adventure Sports Center esperientziak aurkeztuko dituzte. Kafearen ondotik, Garona ibaian aurkeztutako esperientziak ezagutzera emanen dituzte.
12:50etik 13:30era, Cederna-Garalureko Edurne Elsok, “Natur ingurunea, toki garapenerako baliabidea Nafarroako Mendialdean. Esperientziak, abian jarri diren proiektuak eta etorkizunerako estrategiak Baztan-Bidasoan” aurkezpena eginen du. Mintegia akitzeko, pintxoak eskainiko dituzte jauregiko beheko solairuan.