Teilatuak berritu dizkiote Joantoneari eta Iriarteari. Herriaren erdialdean daude, eta egitura franko berezia dute, elkarri itsatsiak baitaude: Iriarteko teilatu puska bat Joantenearen segida da, eta Iriarteak koska bat kentzen dio Joanteneari. Iriartea aspaldiko etxea da, eta orain 300 bat urte luzatu omen zuten. Geroztik dauka forma bihurri hori. Horretaz landara, Joantone esaten zaion etxe barrenean bi alde daude, erdian kaldurrerainoko pareta batek bereiziak; iparreko aldetik Mantxenea omen da, eta hegoaldetik, Joantonea bera. Diote borda guziek dutela beren etxea herrian, eta Mantxeneko bordak huraxe izanen du, inondik ere.
ETXEEN IZENEZ
Irtea esaten zaio egunerokoan, baina Iriartea heldu da agirietan. Eratsungo eta beste herri askotako etxe izena da. Abizena ere bada, eta hitz horrekin ez da beste askorekin izaten den dudarik: lehenik etxeak hartuko zuen, eta gero pertsonak, tokia erakusten baitu esanahiz: hiri edo herri artea. Hizkera batekoek eta bestekoek izen hori bera alde batera edo bestera idazteko ohitura izan dute: Iriarte, Hiriart, Idiart... Joantoneak, berriz, Joantoren etxea esan nahi du. Pixkanaka aldatuz joan izanen da etxearen izena: Joantorena, Joantorenea, Joantonea, Joantenea. Mantxeneaz, berriz, esan digute agiri zahar batean Mari Juantxenea heldu dela eta besteren batean Maritxontxea eta Maritxonea. Alde ederra, orduan, denboraren joanean gertatu dena.