Azaroaren 15ean Donezteben jokatuko den Nafarroako I. Mailako Aizkora Txapelketaren finalerako txartelaren bila, igande honetan, kanporaketa jokatuko da Etxarri Aranatzen. 13:00ean hasiko da lehia da eta bederatzi aizkolari ariko dira: Floren Nazabal, Jon Rekondo (Leitza), Ander Erasun (Aurtitz), Antonio Senosiain, Donato Larretxea (Arantza), Juan Jose Lopez, Aitor Senosiain, Oihan Larretxea (Bera) eta Ruben Saralegi (Leitza). Txapelketan aritzekoa zen hamargarren aizkolaria Beintza-Labaiengo Xabier Mindegia zen, baina gerriko minez dabilela eta, ez du txapelketan parte hartuko.
Moztu beharreko enborrak hauek izanen dira: bi kanaerdiko, bi 60 ontzako eta oinbiko bat. Lehen bortz sailkatuek finalerako txartela lortuko dute eta azken bi sailkatuek, berriz, maila galduko dute.