Jorge Fernandez Diaz Espainiako barne ministroa Maxurrenea bisitatzera etorri zen irailaren 9an. Bertan adierazi zuen, guardia zibilek Maxurrenean segituko dutela beste hamar urtetan.
Aurten hamar urte bete dira Nafarroko Gobernuak barne ministeritzari alokatu ziola eta beraz kontratoa bertan behera uzteko aukera zegoen. Dirudienez, Leitzako Udala eta Nafarroko Parlamentuko iritziaren aurka, UPNko gobernuak Maxurrenea etxean guardia zibilak jarraitzea du helburu, nahiz eta Leitza kultur dotazioetan oso eskas dagoen.
Ministroa Maxurrenean zela, herritar talde bat plazan bildu zen eta Maxurrenera aldera joaten saiatu ziren baina guardia zibilak galerazi egin zuen martxa. Horren aurrean, herri guztian zehar zabaldurik kontzentratu ziren herritarrak ministroaren jarrera gaitzesteko.
Honen harira, Sortuk Iruñean giza katea osatzeko deia zabaldu du. Irailaren 21ean izanen da eta estatuko delegaritza eta Galizia etorbideko guardia zibilen komandantzia lotuz giza katea egitea dute helburu.