Urteroko hitzorduari hutsik egin gabe, aurten ere besta ttikiak antolatu ditu Gazte Burrunbak Donezteben. Doneztebarrak elkarteko bazkideek ere karrikara aterako dituzte produktuak ortziralean, Udazkeneko Merkatua ospatuko baitu.
Merkatarien feria, Turismo Bulego ondoko aparkalekuan izanen da eta euria eginen balu, eliz atarian. Merkatuan parte hartuko duten komertzioek beraien produktuak eskeiniko dituzte egun guztian zehar, 10:00etatik 19:00etara. Arratsaldean, 17:00tik 19:00etara argazki lehiaketa bat burutuko da eta irabazlearentzat sari sorpresa bat izanen da. Ondotik, Gazte Burrunbak antolatuta Doneztebeko Besta Ttikiak hasiko dira.
Besta ttikiak Gazte Burrunbaren eskutik
Gazte Burrunbak antolatutako besta ttikiak 19:00etan txosnan eskainiko den luntxarekin hasiko dira. 20:00etan txupinazoa botako da eta ondoren gaua animatzeko Agerralde ariko da.
Larunbatean hainbat ekitaldi antolatu dituzte gazteek. 11:30ean Mus txapelketa jokatuko da elizako aterpean. 14:00etan Gazte bazkaria Santamarian. 17:00etan koadrila arteko sokatira saioa jokatuko da Santaluzia plazan. 19:00etan trikipoteoa eginen da herrian barna eta 22:00etatik aitzin gaupasa Zopilotes Txirriaus eta DJ Luismirekin.