Egitarauan aurreikusitakoa zuzen betez, festa onak, herrikoiak eta partehartzaileak atera ziren amabirjinak. 30 metroko arbola zutik jartzearekin hasi ziren eta urtero bezala, ekitaldi jendetsua izan zen.
Amabirjin Egunean, goizean aizkora apustu ederra ikusteko aukera izan zen, Joxeantonio Loiarte herritarra tartean zela. Arratsaldean, dantzariek saio polita eskaini zuten.
Abuztuaren 16an, haurren bost pilota partida jokatu ziren, eta horietako bat neskena. Helduak futbitoan aritu ziren, eta egin zuen eguraldi beroarekin gogotik bota zuten izerdia. Arratsaldean, berriz, tortilla lehiaketa egin zen eta hamar aurkeztu ziren. Eva Elizaldek irabazi zuen eta 14 urterekin bigarren Karmele Santesteban gelditu zen. Plater tiroketa txapelketan, bestalde, Patxi Aldabe nagusitu zen.
Abuztuaren 17an, berrikuntza gisa, moto zaharrak ikusteko aukera izan zen Joxe Migel Arangurenen eskutik. Hogei moto zahar baziren, eta jendeari gustatu zitzaizkion. Haurren Eguna ere bazenez, neska-mutikoentzako jokoak izan ziren, gurasoen eskutik. Eguerdian, 65 haur eta 35 guraso bildu ziren bazkarian. Kulkiren ikuskizunean ere ongi pasatu zuten. Mus txapelketa ere aspaldiko jendetsuena izan zen. 22 bikote bildu ziren eta Patxi Aldabe eta Xabier Bendoiro nagusitu ziren.
Azken egunean, hau ere berrikuntza, bertso pilota izan zen. Imanol eta Mikel, Urko eta Beñaten kontra aritu ziren, Peñagarikano eta Maia bertsolariak botillero zituztela. 22-19 lehenengoek irabazi zuten. Baina emaitzaren gainetik, sortu zen giro polita da nabarmentzekoena. Herri bazkarian ere Peña eta Maia aritu ziren, eta bildutako 65 lagunek ederki pasatu zuten. Akitzeko, arbola bota eta heldu den urtera arte agurtu genituen festak.
Lerro hauen bidez, eskerrak eman nahi dizkiegu muxiko dantzari, joaldun, musikari, guraso, kirolari eta festak aurrera ateratzeko laguntzen duten guztiei, beraiei esker baitira festak diren bezalakoak.