Kutxa Torneoak berriz ere bi doneztebar paratu ditu aurrez aurre: Julen San Migel eta Koteto Ezkurra. Txapelketako finalerdia asteartean jokatuko dute Hernaniko Galarreta pilotalekuan, 18:00etan.
Joan den larunbatean partidako pilotak aukeratu zituzten, hiru pilotari bakoitzak eta ezaugarri desberdinekoak. Ezkurra izan zen materiala aukeratzen lehenbizikoa, eta bortz minutuz bereizi zituen pilotak. San Migelek kolpearekin min egin diezaion oztopatzeko pilotak aukeratu zituen, atzelari gaztea peloteora bultzatuko dutenak. 131, 128 eta 126 gramokoak dira.
San Migelek, berriz, hamar minutuz bereizi zuen materiala, 131, 130 eta 126 gramoko pilotak. Berak adierazi bezala, «sakean min egiteko eta material bizia» aukeratu zuen. Gustura gelditu zela onartu zuen.
Duela hiru urte Torneoko finalean izan ziren biak aurrez aurre. Orduan Ezkurrak irabazi zuen 30-24ko markagailuarekin. Aldi honetan zer gertatzen den astearte arratsaldean jakinen da. Partida irabazten duenak Urrizaren kontra jokatuko du finala.