Lurreko Telebista Digitala sartu zenetik, egoera alegalean dabil Xaloa Telebista: ia 16 urte lizentziarik gabe, eta azken aldian, diru laguntzarik gabe. Orain, berriz, Nafarroako Gobernuak Iruñerrian eta Nafarroa osoan emititzeko lizentziak esleitu dizkio. Nafarroan euskarazko telebistentzat aukera berria ireki dela erran du batek baino gehiagok, Gobernuak euskara kontuan hartzen duten hiru proiekturi bortz lizentzia banatu baitizkie: Xaloa eta Abian Komunikazioari Iruñerako eta Nafarroa osorako bina eta Hamaika telebistari Iruñerako bat.
G. PIKABEA | ESKUALDEA
Zein da gaur egun Xaloaren egoera?
Momentu honetan egoera nahiko larria da, estu gaude. Alde batetik, azken urteotan hedabideendako ematen diren diru laguntzak ez ditugu jasotzen eta horrek estutu egin digu ekonomia. Bertzetik, publizitatea da gaur egun diru iturri nagusia eta publizitaterako ez dira garairik onenak. Horren ondorioz, langileak ERE batean daude duela urte batetik honat, nahiz eta ekoizpena ateratzeko konpromisoa hartua duten. Lanean berdin segitzen dute, baina ERE baten barrenean ari dira.
Nafarroako Gobernuak Iruñea aldeko lizentziaz gain, Nafarroa osoan emititzeko lizentzia ere eman dizue. Zein da egin duzuen lehen balorazioa?
Lehen balorazioa positiboa izan da. Lizentzia izatearekin batera, guttienez diru laguntzak jaso ahal izanen ditugu. Bi aukera eman dizkigute, eta lanean segitu ahal izatea ahalbideratuko diguna aukeratu nahi izan dugu. Gure eskualdean emititu ahal izateko Nafarroa osokoa garestia da, baina Iruñekoa hartuta ikusi behar da eskualdean emititzea bermatuko digun.
Espero zenuten?
Zalantza haundiak genituen. Iruñerako lau lizentzia zeuden eta hiru proiektu aurkeztu ginela ikusita, agian aukera bat izaten ahal genuela pentsatzen genuen. Autonomikoan bi lizentzia zeuden eta hiru proiektu aurkeztu ginen. Hor ez genuen pentsatzen aukerarik izanen genuenik. Kasu honetan biak eman dizkigute eta sorpresa erlatiboa izan da. Bertze aldetik, Xaloa Telebistak lanean segi zezan eskatuz, Parlamentuak Nafarroako Gobernuari egindako agindu bat ere bazegoen.
Nolatan pentsatu zenuten gure eskualdetik Iruñera edo Nafarroa osora hedatzea?
Eskualderako lizentzia bat eskatu izan dugu aspalditik, baina badirudi zailtasun haundiak daudela eskualdea demarkazio baten barrenean sartzeko. Errazago ikusten zuten modu honetara lizentzia ematea. Lanean segitzeko lizentzia eskuratzea behar-beharrezkoa genuelako aurkeztu ginen lehiaketetara. Aterabide bat bilatu behar genuen, ez zen guk nahi genuena, baina ezin genuen beti esperoan egon. Aurtengo urrian 16 urte beteko ditu Xaloa Telebistak egoera alegalean lanean eta aurrerapauso bat ematea erabaki genuen. Bertzela, lizentziarik gabe, eta ondorioz, diru laguntzarik eta deus gabe, ito eginen ginateke.
Nola aldatuko da zuen proiektua?
Eskualdetik at egin beharreko guztia erronka haundia da Xaloarendako. Gure eskualdeari zerbitzua ematen segituko dugu eta eskualderako orain arteko programazio bera mantendu nahi genuke. Eskualdean emititu ahal izatea bermatu nahi dugu. Eta hori garbi dugu, hemengoak gara, hemen sortuak eta hori izanen da lehentasuna. Eta hortik goiti ahal dugun guztia eginen dugu. Guretzat garrantzitsuena lanean aritu ahal izateko lizentzia eskuratzea zen. Hori da abiapuntua. Diru aldetik juxtu gabiltza eta juxtu segitzen baldin badugu, erantzuten ahal dugunari erantzunen diogu. Edozein moduz, proiektua oraindik martxan jarri arte urte bateko epea izanen dugu eta urte horretan gauza aunitz aitzineratzen ahal dira.
Euskarazko telebistentzat aukera berria ireki da Nafarroan?
Bai, noski. Euskaraz lan egiten duten hiru proiekturen artean bortz lizentzia banatu ditu Nafarroako Gobernuak. Gisa honetara euskararendako atea irekia gelditu da Nafarroan.
ERABAKIA ASTE HONETAN
Xaloa Telebistak Iruñerrian eta Nafarroa osoan emititzeko bi lizentziak eskuratu ditu. Lerro hauek idazterakoan oraindik deus erabaki gabea zuen, baina uztailaren 23rako eman beharra zuen erantzuna, Gobernuaren proposamenak onartzen dituen ala ez adieraziz. TTIPI-TTAPAri adierazitakoaren arabera, bi lizentzietako bat hartzeko asmoa zuen, eskualdean emititzen segitu ahal izatea ahalbidetuko diona.