Arkupeak elkarteko zuzendaritza batzordea ekainaren 26an bildu zen, bazkideen interesekoak diren zenbait gai lantzeko. Gaur egun defizit txiki bat duten kontuen berri eman zuen presidenteak, baina hori moldatu eginen da aportazio ezberdinekin. Esate baterako, “Zuk aukeratu, zuk erabaki” programan 817 pertsonek babestu dute Arkupeak elkartearen egitasmoa eta beraz, 8.170 euro jasoko dira.
Aurten, bazkideen besta urriaren 17an ospatuko da Donezteben eta bertan omenduko dituzte 85 urte betetzen dituzten bazkideak eta Urrezko Ezteiak ospatzen dituzten senar-emazteak. Elikagai Bankuko komisioari laguntzeko eltzeitsua ere egun horretan jarriko da, beharrean dauden pertsonei janaria erosi ahal izateko.
Elkartearen egoitzako bigarren solairuan dagoen bilera aretoaren barnean podologarentzat gelatxo bat ere egokituko da. Ordua eskatzeko 629 821039 telefonora deitu behar da.
BIDAIAK
Bidaietako anbulantziaren erabilera ere interes handiko gaia da. Bi aukera aztertu dituzte batzordean: orain arte bezala segitzea edo profesional bat (mediku, erizaina) bertan izateko aukera. Itxura batean, Arkupeak da bidaietan anbulantzia bat erabiltzen duen elkarte bakarra, diru-laguntzetan ere jeitsiera handia izan da eta gastuak kentzeko aukerak aztertzen ari dira.
Ekainaren 19an mendizale taldetxo bat Saioara igotzen saiatu zen, baina eguraldi txarraren ondorioz, Txarutara joan ziren egoera onean zeuden bide eta pisten barna, gero Almandozko Beolan bazkaltzeko. Biharamonean, Gesaltza-Añana bisitatu zuten 140 bazkidek. Erromatarren garaitik gaur egunera arte gatz produkzioaren berri eman zien gidari batek. Gasteiz bisitatu zuten gero.
17 mendizale joan ziren uztailaren 1ean Hiru Erregeen Mahaia, Auñamendi, Orhi, Txamantxoia, Lakora eta Lakartxela igotzera.
Beste alde batetik, 99 lagunek eman dute izena irailean Carlomagnoren Bidea egiteko. Bidaia bi taldetan egitea rabaki da.Hilaren 10ean Leitzaldea, Malerreka eta Bortzirietako bazkideak aterako dira eta 11n Zugarramurdi, Urdazubi, Baztan eta Bertizaranakoen txanda izanen da.
Uztailean, Aralarko santutegira joango dira aiton-amonen eguna ospatzera eta gero Gorraizko Gazteluan bazkalduko dute. Abuztuan, berriz, Arantzazun izanen dute hitzordua eta irailean Lezon eta Benidormen barrena ibiliko dira.
Azkenik, 23 bazkidek eman dute izena Santiago Bidea egiteko. Hasiera batean irailean egitekoa zen, baina beharbada abuztu hondarrera aurreratuko da.