Lan publikoaren alde eta pribatizazioaren kontra elkarretaratzea egin zuten inguru honetako basozainek ekainaren 27an Bertizko Natur Parkearen atarian.
Kontzentrazioan aipatu zutenez, «ekainaren 7an GAN enpresa publikoan aurkeztutako EREak langileen %55 kaleratzea planteatzen du, hau da 65 langile finko kanporatzea eta hauei gehitu behar zaie lehendik bidaliak izan diren ebentual guziak».
Enpresa publiko hau lanean ari da 1982etik eta galerarik eta arazorik gabe aritu da orain arte. «Orain badirudi administrazioa mehetu nahi horretan enpresatik kanpoko zorrak (Los Arcoseko zirkuitua, Sanferminetako museoa…) nahi dizkiote sartu gobernutik eta aitzaki moduan erabili». Basozainek eman dituzten datuen arabera, «enpresa publiko guzien zorraren %2a du GANek, baina kaleratze guzien %50a sufritu behar du». Lan publikoa hondatu eta pribatizazioaren alde egiteko bertze pauso bat iruditzen zaie. «Gure kasuan, 13 basozain postu amortizatu dira aurten, postu hauek desagertu dira betirako, eta orain erretiratzen diren basozainen postuak ez dute betetzeko inolako asmorik».
Beraien lan arloa, osasuna edo hezkuntza bezain garrantzitsua ez dela onartu arren, «bai uste dugu ingurumenaren zainketa eta gestioa ez dela esku pribatuetan utzi behar inolako kontrolik gabe».