Hirugarren urtez segidan Nafarroako Herriarteko pilota txapelketa nagusiko finalerako txartela eskuratu zuen Doneztebek. Ekainaren 30ean, igande goizean jokatu zuen Iruñaren kontra, baina aitzineko bietan ez bezala, oraingoan galtzea suertatu zitzaion.
Ez ziren ongi hasi gauzak. Alebinetan, Doneztebeko Julen Santesteban eta Gaizka Agirrek 5-18 galdu zuten Iruñeko Oskoz eta Cuairanen kontra.
Kontuajk berdinduagoak joan ziren bigarren partidan, infantil mailakoan. Doneztebeko Iker Salaberriak eta Julen Saldiasek 18 eta 14 irabazi zieten Iruñeko Garcia eta Cordon-i, puntu garrantzitsua eskuratuz.
Jubeniletan ere, garaipen garbia lortu zuten Doneztebeko Joanes Bakaikoa eta Ruben Medinak, 22 eta 6 irabazi baitzieten Iruñeko Jamar eta Anduezari.
Gauzak honela, seniorretako azken partidan 16 tantu egitea aski zuten Bendoiro eta Gorritik txapela hirugarren urtez segidan Doneztebera ekartzeko. Diaz eta Etxamendiren kontrako partida ongi hasi zuten gainera, 0-5 irabaziz, baina seinako berdinketaren ondotik, gehiago izan ziren Iruñekoak. Azkenean 22-10 irabazi zuten eta beraz, bina partida irabazi arren, Iruñeak 60 tantu egin zituen eta Doneztebek 55.