Senior, master-30, master-40, master-50 eta master-60 kategorietako Nafarroako txapeldunak ekainaren 23an, igandean erabakiko dira CC Baztandarrak antolatutako Baztangoizako infernua proban. Arizkunen abiatuko da 10:00etan eta 82 kilometrok ibilbidearen ondotik, Arizkunen bertan helmugaratuko dira txirrindulari beteranoak.
Ez ohiko ibilbidea izanen dute, Arizkunen abiatuta, Lamierritako errotonda, Ordoki, Laurentx, Arizkun, Erratzu (Lastirian barna), Lamierrita, Arizkun, Amaiur, Punpulustako gaina, Ordoki, Lamierrita, Arizkun, Laurentx, Elbete, Arraioz, Irurita, Lekaroz, Elbete, Bergara, Aintzialdeko gaina, Arizkun, Erratzu (Lastirian barna), Lamierrita, Ordoki, Amaiur, Punpulustako gaina, Laurentx, Arizkun, Erratzu (Lastirian barna), Lamierrita, Ordoki, Amaiur, Punpulustako gaina eta Laurentx-en barna, berriz ere Arizkunen helmugaratzeko.
Trasnbidasoa-Euromaster-Sinertecnic taldekoak saiatuko dira garaipenaren bila, asteburuan istripu baten ondorioz lepauztaia hautsi zuen Mikel Arburua igantziarrari eskaintzeko.