Euskal Herriko XXV. Eskolarteko Txapelketa jokatuko da larunbat honetan Orioko kiroldegian. Goizez eta arratsaldez izanen dira saioak. Alde batetik, goizez, 11:00etatik aitzinera, 14 urtera artekoak lehiatuko dira, taldeka. Arratsaldean, bertzalde, 15:30ean hasita, 15-18 urtekoak ariko dira, banaka. Ikastolen Elkarteak eta Bertsozale Elkarteak antolatutako ekimena da.
Tartean eskualdeko bertsolari gaztetxoak ere izanen dira. 14 urtekoen artean, Nafarroa ordezkatuz leitzarrak ariko dira: Xabat Ilarregi, Oiher Altzelai eta Joanes Ilarregi. 15-18 urtekoetan, berriz, Nafarroatik bi bertsolari joanen dira eta horietatik bat lesakarra, Maddalen Lopez.