Erreka Kirol Elkarteak kirola eta besta uztartuta egun osoko besta antolatu du larunbaterako. Baina bezperan ere zenbait ekitaldi izanen dira. Hona hemen bi egunetarako prestatu duten egitaraua:
Ortzirala, ekainak 7
16:30ean Erreka Pilota Eskolako Finalak jokatuko dira 4 t'erdiaren barrenean. 20:00etan mendi eskaladari buruzko proiekzioa eskainiko da Igor Agestaren eskutik Leku Eder Zineman. 22:00etan Santa Luzia Plazan Mus Txapelketa eginen da.
Larunbata, ekainak 8
09:30etik aitzinera kiroldegian partidak. Hasteko, Errekako alebin mutilak eta neskak ariko dira, 10:30ean infantil neskak, 11:30ean infantil mutilak. Erreka eta Anaitasunaren arteko lehia izanen da, Kopa irabazi duen herriko taldea, liga irabazi duen taldearen aurka ariko da.
12:30ean judoak hartuko du lekukoa eta erakustaldia eskainiko dute judo eskolako ikasleek. 15:30ean berriz eskubaloia, benjaminen partida izanen da. 16:30ean jubenilen eta beteranoen arteko lehia. 17:30ean hasiko da lehia nagusia: triangular haundia. Erreka A, Erreka B eta Izarren Taldea elkarren kontra ariko dira. Errekako talde seniorra bi taldetan banatua eta Izarren konbinatu bat. Horien artean, nola ez, Niko Mindegia (Naturhouse Logroño) eta Ibai Meoki (Anaitasuna), Asobal mailan ari diren bi doneztebarrak ariko dira.
Aipatu, bertzalde, partiden artean Errekako Dantzarien erakustaldia izanen dela. 21:00etan Herri Afaria eginen da Santa Luzia Plazan eta gauean gaupasa DJ Luismi-rekin.