Nafarroako Gobernuari 2013an Toki Erakundeetarako eta hain zuzen, Babestutako Gizarte Lan proiektuak garatzeko oinarriak ezartzen dituen dirulaguntzen deialdiaren Foru Agindua aldatzeko eskatu diote Ultzama, Malerreka, Altsasu, Irurtzun, Etxarri Aranatz, Leitza, Bortziriak eta Baztango Oinarrizko Gizarte Zerbitzuen Mankomunitateek, Nafarroako mendialdeko herri ttikiak guztiz kaltetuak aterako direlako. Horretarako, helegitea aurkeztu diote dirulaguntza arautzen duen Foru Aginduari.
Gizarte Mankomunitateetako ordezkariek diotenez, «orain arteko proiektuetan ez bezala, esleipen irizpideak aldatu egin dituzte eta zonalde bakoitzeko behar zehatzei erantzuteko aukera izan beharrean, biztanlego kopuruari lehentasuna eman zaio eta ondorioz herri ttikiak kaltetan aterako dira». Azaldutako kexak bereziki azpimarratu nahi du Mankomunitate bakoitzari jartzen zaion muga, mila biztanleko gehienez 3 hilabeteko kontratazioa egiteko aukera besterik ez baitu onartzen dekretuak. Horrek erran nahi du, hiriburu eta herri haundiek askoz aukera gehiago dutela kontratazioak egiteko eta aldiz, herri txikien aukera guztiz baldintzatua gelditzen dela.
Irizpide aldaketa hauek oraindik gehiago larriagotzen dituzte azkeneko hiru urtetan jasandako murrizketen ondorioak eta babestutako gizarte lanaren egoera prekarioa. Guztira %70ko murrizketa jasan du (2010ean 7.170 euroko dirulaguntza izan zuten proiektuak, eta 2013an 2.194 eurokoa besterik ez da izan). Honek kolokan utzi du gizarteratze beharrei erantzuteko aukera.
Enplegu baliabidea izateaz gain, bertan akonpainamendu sozialaren eta formakuntzaren garrantzia azpimarratu nahi dute Gizarte Mankomunitateek eta elkarretaratzea egitekoa zuten hilaren 27an Iruñean, Gizarte Politika Saileko bulegoen parean.