Hirugarren urtez segidan Laxoaren Eguna antolatu zuten Oizen Laxoa Elkarteak, Bertizko Partzuergo Turistikoak eta Oizko Posadak, udalak eta herriko landa etxeek, Nafarroako Gobernuaren laguntzaz. Maiatzaren 26an, igandean, eguraldi ederra izan zuten eta Eusebio Arregi, Doneztebeko zapataria eta guante egilea omentzeko aprobetxatu zuten.
Izan ere, laxoan aritzeko nahitaezkoa da guantea eta tresna hori edukitzeko, nahitaezkoak dira guantegileak izatea ere. Eta gaur gaurkoz, guante egile gutti gelditzen dira. Eusegio Arregi, Doneztebeko zapatagilea da horietako bat. 84 urte ditu eta zorionez, ofizioa gazte bati, Jose Luis Arozena doneztebarrari erakutsi dio. Berari Ignacio Bertizek erakutsi zion, honek 80 urte zituenean. Orduan Arregik 17 urte bertzerik ez zituen. Geroztik, beti izan ziren guanteak Eusebio Arregik Karrika Nagusian izan zuen zapatadendan.
Eusebio Arregi eta dagoeneko hila dagoen Beintza-Labaiengo Florentino Ibarrak hornitu dituzte laxoan ari diren pilotariak azken urteetan. Horregatik, Oizek eta Doneztebe Ek jokatu behar zuten txapelketako partidaren aitzinetik omendu zuten Arregi. Argazki enmarkatu bat oparitu zioten eta gustura hartu zuen oparia Eusebiok, familiak eta Laxoa Elkarteko ordezkariek eta pilotariek inguratua.
Laxoa txapelketako partidan, Oizek 9-6 irabazi zion Doneztebe Eri, eta aspaldiko ohiturari eutsiz, eguerdian Angelusa kantatu zen, partida geldituta. Zenbait eskulangileren lana ikusteaz gain, Laxoaren inguruko erakusketa ere ikusgai izan zen. Oizko Posadak bi lagunendako bazkaria zozketatu zuen eta produktu tipikoen dastaketa ere eskaini zuen.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!