Iruñea eta Irun lotzen dituen N-121-A errepidea berriz ere itxita dago, Belate parean. Tunelen parean bertze luizi bat gertatu zen joan den larunbat arratsean eta hortaz, erabiltzaileek berriz ere Belateko mendateko errepide zaharra (NA-1210) erabili beharko dute. Larunbateko lur mugimenduarekin kamioi bat harrapatuta gelditu zen, baina ez zen inor zauritu.
Ez da azken hilabetean gertatutako luizi bakarra. Joan den apirilarenn 14an eta 29an luiziak izan ziren, eta azken erortzaren ondotik, errepidea itxi egin behar izan zuten. Maiatzaren 8an zabaldu zuten Irunerako erreia, baina larunbatean lurra erori ondotik, itxita dago bi noranzkoetan.
Orain, berriz, eguraldiak laguntzen badu, aste hondarrerako bidearen zati bat ireki ahal izanen dutela adierazi du Nafarroako Gobernuko Sustapen Departamentuak. Irunera doan erreia irekitzea da asmoa. Hala jakinarazi zuen atzo.
Sustapen Departamentuak lur-jausieei behin betiko irtenbidea eman nahi die, eta horren inguruan ikerketa egin duela azaldu zuen atzo. Eginen diren lanen bitartez, hegalean hormigoizko piloteen pantaila bat jarriko dela iragarri du, trabaketa-habe batekin, eta behealdean eusteko harri-lubeta eginen du material pikortatuarekin beteta. Lan hauek Belateko mendatetik doan errepidea bebestuko omen dute, eta gisa honetara, N-121A aldera lurra erortzea saihestuko dela eta ezponda egonkortuko dela ere gaineratu du.