Erronka berezia jokatu zen martxoaren 24an Doneztebeko pilotalekuan; aizkolari bat biren kontrako apustua. Oihan Larretxea eta Felix Etxeberriak osatutako bikotea batetik, Joxemari Olasagasti bertzetik. 3.000 euro jokoan. Harmailetan 800 ikusle, handia zen ikusmina eta aizkolariek ez zuten huts egin, Azkenean, eskualdeko bikoteak lortu zuen garaipena, minutu eta 48 segundoko aldea aterata.
Hogei kana-erdiko ebaki zituzten. Olasagastik bakarka eta bikoteak bosna enborreko txandak eginez. Lehia estua bizi izan zen. Etxeberriak eskarmentua erakutsi zuen eta berak zabaldu zuen tartea. Oihan Larretxeak apustuaren bigarren zatian izan zuen gorakadarekin ezinezkoa izan zuen Olasagastik buelta ematea. Lanak 51:28 minutuan akituta bikotea atera zen garaile. Olasagastik berriz, 53:17 minutu behar izan zituen hogei kanaerdikoak mozteko.