Martxoaren 23an 70 bat lagun inguruk egin zuten gauezko mendi itzulia eta herriko jendeaz gain, Bortzirietatik, Baztan aldetik, Gipuzkoatik eta Iruñaldetik ere etorri zen jendea eta bazeuden Palencia, Madril, Kantabria eta Biriatuko batzuk ere. Ibilbideak interes handia sortu zuen eta ETB eta Telenavarratik ere etorri ziren ibilbidea grabatzera. Antsolokueta auzotik abiatu zen, Perugorria baserritik zehar eta Aldalurko borda gainetik Usategietara eta bidean geldialdi batzuk egin ziren, etxeetako zakurrak nola ixilarazten zituzten eta bidegurutzeak nola zaintzen zituzten azaltzeko. Txorilepon berriz Kontrabandistak eta eltzetzuak agertu ziren ilunpetan, beraien antzezpena eginez. Buelta berriz, Errandoko lepotik, Gorosurreta auzoan beiti joan eta Elizaldeko bordatik Antxurneko borda azpialdetik pasa eta Arrose parean berriz ere herrira sartu ziren. Eguraldi ona zegoen gauez ibiltzeko eta ilargi ederrarekin, ez zen linterna beharrik ere zenbait lekutan. Bertiz Partzuergoak ere lagundu zuen antolakuntzan eta balorazioa hagitz ona egin zen.