Xabier Silveira lesakarrak irabazi du Nafarroako Bertsolari Txapelketa. 1.500 bertsozale elkartu ziren martxoaren 23an Iruñeko Anaitasunako finalean eta giro ezin beroago jarri zuten saioaren hasiera-hasieratik. Zortzi finalistek maila handiko saioa eskaini zuten eta azkenean Xabier Silveira atera zen garaile 588 punturekin. Hogei puntuko aldea atera dio bigarren sailkatuari, Julio Sotori, hortaz ez zen buruz burukorik behar izan. Bittor Elizagoien bertsolari beteranoak jantzi zion txapela Txapeldunari. Xabier Silveiraren zazpigarren txapela da aurtengoa.
Erika Lagoma eta Eneko Fernandez lesakarrak hirugarren eta laugarren sailkatu ziren. Eneko Fernandez izan da txapelketa honetako ezustekorik handiena, bere lehen parte hartzean (iaz Bardoak txapelketan plazaratu zen lehen aldiz eta txapeldun izan zen) finalera sartu ez ezik, ohorezko postua lortu baitu. Izan ere, lau bertsolari horiek lortu dute udazkenean jokatuko den Euskal Herriko Bertsolari Txapelketa Nagusirako txartela. Bosgarren postua Eneko Lazkozentzat izan zen (539,5 puntu) , eta haren gibeletik Jon Barberena (526 puntu), Oskar Estanga (506,5 puntu) eta Aimar Karrika (480,5 puntu) sailkatu ziren.
1.500 lagunek lepo bete zuten Anaitasuna kiroldegia eta giro ederra izan zen. Nafarroako bertso eskoletako ordezkariek eman zizkieten sariak finalistei.
SAILKAPENA
1. Xabier SILVEIRA (Lesaka) 588 puntu
2. Julio SOTO (GorritI) 568 puntu
3. Erika LAGOMA 558 puntu
4. Eneko FERNANDEZ (Lesaka) 541,5 puntu
5. Eneko LAZKOZ (Etxarri Aranatz) 539,5 puntu
6. Jon BARBERENA 526 puntu
7. Oskar ESTANGA (Gaintza) 506,5 puntu
8. Aimar KARRIKA (Auritz) 480,5 puntu