Urteroko tradizioa bete zen aurten ere, Ortzegun Santuan, Beintza-Labaingo herrian. Ohitura den bezala, meza ospakizuna eta gero, herriko haurrak plazan bildu ziren etxez etxe joateko goxokiak biltzera, karrakak lagun zituztela.
Etxe bakoitzean abesti bat kantatzen dute goxokiak jaso aurretik:
"Gaztain ximal ximalak
andriak elizera
gizonak tabernera
haurrek haurretera
apezak txokoltia hartzera".
Betidanik ezagutu da ohitura hau. Garai batean goxokiak banatu ordez, intxaurrak, urrak eta gaztainak botatzen zitzaizkien haurrei.
Argazkian ikus daitekeen bezala guztiek gozamen ederra izan zuten eta goxokiz beteak poz pozik itzuli ziren beraien etxeetara.