Nahiz eta herritik aurtengo Korrika ez pasa, hainbat ekitaldi antolatu ziren eta herriko gazte, heldu, neska eta mutilak korrikarekin bat eta korrika egin dute. Alde batetik martxoaren 15an iragarria zegoen korrika ttikia egin zen. Pulunpa eskolako irakasle, ikasle eta gurasoek herriko bazter guzietan ibili ziren, lekukoa pasatzen ikasle guzien artean, zaharrenetik hasi eta gaztetxoekin tartekatuz. Murrizketen kontrako argazkia egin ondotik, indarrak hartu zituzten guraso elkartekoek prestaturiko txokolate beroarekin.
Martxoaren 17an eskualdetik pasatu zen Korrikan bi kilometro hartuak zituzten udalak eta Malerrekako eskola ttikiek. Goizeko seiak eta erdiak aldera hartu zuten lehenbiziko herritarrek lekukoa eta geroxeago besteek. Denen artean herritar koadrila batek parte hartu zuen. Gero, oraindik indarra zutenek kilometro gehiago egin zituzten. Ohitura faltagatik, ondorioak izan zituzten batzuk, baina denak kontent gelditu ziren.