Erremontea ez dago bere onenean, baina Saldiasko erremontelariek notizia onak ematen dituzte oraindik. Hondarrekoa Danbolingo Aritzek debuta egin behar duela. 20 urterekin sartuko da Endikaren ondora.
Esku pilota utzi eta erremontean hasi zen orain urteren bat dela. Afizionatuetan dauden txapela guziak irabazi ditu: GRAVNekoa, Noaingo Hiru Kirolekoa, Nafarroakoa eta azkena Euskal Herrikoa. Iaz, baita herriko pala txapelketa ere.
Indar handiko mutila da Danbolingoa, eta ongi moldatzen da frontoian. Ttikitatik du dohain hori, eskola ondoko arratsaldeak frontoian igarotzen baitzituen.
Okerrik ez dela apirilean jokatuko du lehenengo partida Oriamendirekin , Galarretako pilotakeluan. Suerte ona izan dezala!
EUSKAL HERRIKO FINALA
Martxoaren 9an jokatu zuen Aritzek Euskal Herriko erremonteko finala, Iñigo Zubeldia herrikidearekin, Huarteko Euskal Jaien: 40 eta 33 egin zuten, bi azpeitiarren kontra: Segurola eta Larrañaga. Aurrean aritu zen Aritz, eta atzean, Iñigo. Galtzen hasi ziren saldistarrak, 8-2, eta galtzen joan ziren ia partida gehienean (18-14 eta 26-23), baina hondarreko partida berdindu, eta atzeneko hamar tantoetan estualdi on bat emanda utzi zituzten hogeita hamahiruan giputzak.
ENDIKA ERE GORAKA
Mielmarik eta Oskarrek utzi zuten pilotako ofizioa, baina Endikak hortxe segitzen du, eta goraka ari da hori ere. Urte batzuk dira Endika profesionaletan hasirik, eta kategoria gehixeagoko partidak jokatzen ditu orain; gainera, maiz samar sartzen dute hirugarren partidetan.