Herriz herriko txapelketak jokatu ondotik, apirilaren 6an Sunbillako Ulibeltzak elkartean jokatuko dira Xaloa Telebistaren, Xorroxin Irratiaren eta Ttipi-Ttapa aldizkariaren aldeko mus txapelketaren azken partidak. Hain zuzen, herriz herrikoetan txapeldun izan diren bikoteek lortu dute Sunbillarako txartela. 16:00etan izanen dute hitzordua Ulibeltzak elkartean.
Krisi egoera orokorrean sartuta eta Nafarroako Gobernuaren dirulaguntzarik gabe, han eta hemen dirua lortu beharrean daude eskualdeko euskarazko komunikabideak ere. Honela, mus txapelketaz aparte, apirilaren 13an, musika kontzertu handia antolatu dute Berriak, Ttipi-Ttapa aldizkariak, Xaloa Telebistak, Xorroxin Irratiak eta Baztango euskalgintzak, Lur aretoaren laguntzarekin. Lur aretoan eskainiko dute emanaldia 22:00etatik aitzinera Pettik, Anje Duhaldek, Erramun Martikorena eta Joxe Anjelek eta Amaia Zubiriak eta Edortak. Sarrerak 10 eurotan salgai daude.