Donostiako Carmelo Balda pilotalekuan jokatzen ari da profesionalen arteko Munduko binakako pala txapelketa. Bortz bikote ari dira eta Xabi Ibargarai erratzuarra da eskualdeko ordezkaria, Urkijorekin bikote eginez. Horiekin batera, gaur egungo txapeldunak diren Gaubeka eta Aierbe, Fusto eta Larrinaga, Altadill eta Lujan eta Garcia eta Imanol ariko dira txapelaren bila. Hasieran denak denen kontra ari dira ligaxkan. Liga hori irabazten duen bikotea zuzenean sartuko da martxoaren 2ko finalean eta bigarren eta hirugarren gelditzen direnek finalerdia jokatuko dute finalean sartzeko.
Urtarrilaren 21ean jokatutako lehen partidetan, Urkijo eta Ibargarak 1-3 galduzuten, Altadill eta Lujanen kontra eta bigarrenean, Fusto eta Larrinagak 3-0 irabazi zieten Garcia eta Imanol-i.
Bigarren jardunaldia urtarrilaren 26an jokatzekoa zen. Garcia eta Imanol, Altadill eta Lujanen kontra aritzekoak ziren eta Urkijo eta Ibargarai, Gaubeka eta Ayerberen kontra.
Hirugarren jardunaldia otsailaren 2an jokatuko da, laugarrena otsailaren 9an eta bosgarren jardunaldia otsailaren 16an jokatuko da.