Euskal Herriko herri frango bezala Senpere ere ibaien mailari eta zeruari begira egon zen urtarril erditsuan euri anitz egin baitzuen jauts ahala. Egun kezkagarriena urtarrilaren 15a izan zen errekak eta Urdazuri ibaia doi bat atera baiziren zonbait tokitan. Urak zonbait aparkaleku estali zituen eta garaje batzuetan sartu zen bainan zorionez aldi huntan ez zuen kalterik sortu etxeetan.
Luberriako baraderak bere lana egin zuen Nafarroatik eta mendi guneetatik isurtzen den ura atxikiz zonbait orenez. Christine Bessonart auzapeza pozik zegoen kalterik ez baitzen izan eta Luberriako urtegiak bere lana egin baitzuen 400 000 metro kubiko ur atxikiz. Bere erranetan, urak 10 hektarako eremua estali zuen eta guzi hori ez da Senpereko karrikarat etorri bat batean. Luberriako urtegiak 10 milioi euroko gastua sortu zuen eta Iparraldean azken urteetan egin den obrarik haundiena da. Senpereko aintzirak ere ur anitz atxiki zuen. Neguan Ortzango errekaren zati bat husten dute herriko langileek bainan egun euritsu horietan metra batez goratu zen kolpez. Urguri auzoan eraikitzen ari den saihesbideren 30 metrako espaloia altxatu, ereman eta arrunt desegin zuten urek eta horiek izan ziren kalterik aipagarrienak.