Nafarroako Bertsolari txapelketak 41. edizioa beteko du aurten eta ziklo berri bat hasiko du. Izan ere, 2011. urtera arte urtero egiten zen Nafarroako Bertsolari Txapelketa, txapelketa horren ondotik bi urtetik behin egitea erabaki zuen Nafarroako Bertsozale Elkarteak.
Nolanahi ere, 2012koa ez zen debalde izan eta Bardoak, Nafarroako taldekako bertso ekimen arrakastatsua antolatu zen. Aurten, berriz, Txapelketak bere ohiko formatura itzuli da. Oraingo honetan ez da soilik Nafarroako txapela jokoan dagoena, udazkenean hasiko den Bertsolari Txapelketa Nagusian ordezkari nafarrak zeintzuk izanen diren argituko du Txapelketak.
Duela bi urte finala Iruñean egin zen eta harrera ikusita, aurten ere Iruñean bukatuko da Lizarran otsailaren 2an hasiko den txapelketa. Finala martxoaren 23an izanen da Anaitasunan.
Aurten inoiz baino bertsolari gehiago aterako dira plazara, 31. Horietatik seik lehen aldiz hartuko dute parte: Iruñeko Haizea Beruete, Oskar Sanz de Acedo eta Unai Uberetagoena, Lesakako Eneko Fernandez, Elizondoko Xabier Maia eta Oronozko Amaia Elizagoien. Azken urteotan atsedena hartu duten bi bertsolari eskarmentudun itzuli dira, Erika Lagoma lesakarra eta Joxema Leitza arbizuarra.
Saio guztietarako sarrerak aurrez internetez erosten ahalko dira, www.bertsosarrerak.eu atariaren bitartez.
WEB GUNEA ETA SARE SOZIALAK
Web gune berria du Nafarroako Bertsolari Txapelketak. Txapelketaren jarraipena egin ahal izateko www.nafarroakotxapelketa.com web gunean informazio eguneratua eskainiko da. Horrez gain, bertsoa .com web gunean saioetako laburpenak ikusten ahalko dira. Sare sozialen bidez ere, Nafarroako Bertsolari Txapelketa segitzeko aukera izanen da. Facebook-en Nafarroako Bertsozale Elkartearen bitartez eta Twitter-en (@unibertsoa).